Американскиот инвеститор и милијардер Џорџ Сорос го прослави својот 90-ти роденден во, како што рече, „најлошата криза во неговиот живот по Втората светска војна“.
„Ние сме во криза, најлошата криза во мојот живот од Втората светска војна. Јас би го опишал како револуционерен момент кога опсегот на можности е многу поголем отколку во нормални времиња. Она што е незамисливо во нормално време станува не само нормално, туку навистина се случува. Луѓето се дезориентирани и исплашени. Тие прават работи што се лоши за нив и лоши за светот“, изјави Сорос за италијанската „Република“.
Тој верува дека Европа е многу ранлива, многу повеќе од Соединетите држави. „САД се една од најдолготрајните демократии во историјата. Но, дури и таму, измамник како Доналд Трамп може да биде избран за претседател и да ја поткопа демократијата одвнатре“, посочува тој.
„Но, во САД имате долга традиција на проверки, рамнотежа и утврдени правила. И над сè го имате Уставот. Затоа, убеден сум дека Трамп ќе се покаже како преоден феномен што, се надевам, ќе замине во ноември. Но, тој сè уште е многу опасен, тој се бори за својот живот и ќе стори сé за да остане на власт, затоа што го прекршил Уставот на многу различни начини, а доколку ги изгуби претседателските избори, ќе биде сметан за одговорен. Но, Европската унија е многу поранлива, затоа што е нецелосна унија. И има многу непријатели, внатрешни и надворешни“, рече Сорос.
Во врска со одлуката на ЕУ да одобри фонд од 750 милијарди евра за закрепнување, тој вели дека ЕУ направила многу важен позитивен чекор кон својата обврска да позајми пари од пазарот во многу поголема сума од кога било досега.
Но, додаде тој, после тоа, неколку земји, таканаречените „Штедливи пет“ – Холандија, Австрија, Шведска, Данска и Финска – успеаја да го намалат ефектот на постигнатиот договор.
„Трагедија е што овие земји се во основа проевропски, но тие се многу себични. И тие се многу штедливи. И, прво, тие доведоа до договор што ќе се покаже како несоодветен. Намалувањето на плановите за климатски промени и одбранбената политика е особено разочарувачко. Второ, тие сакаат да бидат сигурни дека парите се трошат правилно. Тоа создава проблеми за јужните земји кои се најмногу погодени од вирусот“, рече Сорос.