Министерот Оливер Спасовски во негово име и во името на МВР со најсрдечни желби го честита Воскресението Христово – Велигден.
-Празникот на празниците, Денот со кој ставаме крај на Страдалната седмица, најтешкиот период во годината и преминуваме кон светлината, Ден на торжеството и Ден на радоста – Ден на Воскресение, Пасха Господова, ден во кој „од смртта кон живот, и од земјата кон небото, Христос Бог нè преведе“.
Нека ова воскресенско утро биде огласена громогласно радосната вест за победата над смртта, со порака за надеж и живот, со неисцрпната љубов на Бога, длабоко во нас самите, во нашето срце да ја замениме агонијата на смртта со радоста на Воскресението. Христос ни ги отвори портите кон вечноста, бидејќи да се сведочи, значи да се верува во живот допрен од вечноста. Влегуваме во нов живот, обновени од Воскресната благодат, сведочејќи ја токму таа непобитна стварност и неменлива вистина со најсилните зборови кои го преобразија – Христос воскресна!
Од сето свое срце ви посакувам ова Велигденско деноноќие да бидете во добро здравје, опкружени со ближните, секој еден да ја почувствува таа неискажлива Христова радост. Христос восресна!, стои во честитката на Спасовски.