Првиот контингент вакцини ќе пристигне во Црна Гора во среда, потврдено е за „Вијести“ од Владата на Црна Гора. „Премиерката на Србија, Ана Брнабиќ, ќе му ја предаде донацијата на премиерот на Црна Гора, Здравко Кривокапиќ“, изјавил вчера вицепремиерот на Црна Гора, Дритан Абазовиќ.
Дритан Абазовиќ изјавил дека претходно разговарал со Брнабиќ и дека се договориле за деталите за донацијата, пренесува црногорски „Вијести“.
„Можам да потврдам дека утре околу 18,30 часот вакцините пристигнуваат во Црна Гора. Премиерката на Србија, Ана Брнабиќ, ќе ја предаде донацијата на премиерот на Црна Гора, Здравко Кривокапиќ. Владата на Црна Гора изразува голема благодарност за овој несебичен и хуман гест, што е одличен вовед во подобра билатерална соработка меѓу двете земји “, рече Абазовиќ.
Пред неколку дена, српскиот претседател Александар Вучиќ донираше вакцини на С. Македонија, кои лично му ги предаде на премиерот Зоран Заев на граничниот премин „Табановце“.
Црна Гора е на третото место во светот според вкупниот број на луѓе кои страдаат од коронавирус на милион жители, според податоците објавени на веб-страницата „Ворлдометерс“.
Поради влошената епидемиолошка состојба во Црна Гора, повторно е воведен полициски час, а преземени се посебни мерки за спречување на ширењето на инфекцијата во градовите Будва и Тиват.