Претседателката на српскиот парламент, Ана Брнабиќ, објави дека властите денес ќе достават измена на Законот за буџет за 2026 година, со кој се отвора можност Србија да ја преземе сопственоста врз српската нафтена компанија НИС, објави белградската новинска агенција Бета.
„Утре и задутре ќе преминеме на измените и ќе видите дека по разговорите што (српскиот претседател Александар) Вучиќ ги имаше со различни земји, една од измените ќе предвиди можност ние во одреден момент да ја преземеме НИС“, изјави таа за „Еуроњуз Србија“.
Таа додаде дека се спротивставува на национализацијата, но дека „ништо не треба да го загрозува животниот стандард на граѓаните и економијата“.
„Се надевам дека руските партнери го имаат ова на ум. Дали досега го имале? Би рекла дека не “, рече Брнабиќ.
НИС е под санкции на САД во последните 47 дена, а нивната рафинерија во Панчево, која го снабдува поголемиот дел од домашниот пазар, има уште четири дена додека не биде целосно затворена. Вучиќ го објави ова на вчерашната прес-конференција, додавајќи дека српската влада одлучила да ѝ понуди на руската страна рок од 50 дена за завршување на преговорите за купопродажба на мнозинскиот удел во НИС.
На почетокот на јануари оваа година, САД објавија дека поради војната во Украина и „секундарниот ризик“ ќе воведат санкции врз единствената нафтена компанија во Србија, НИС, која е во мнозинска сопственост на рускиот нафтен гигант Газпром. Вашингтон побара целосно повлекување на рускиот капитал од компанијата, но руската страна дури пред неколку дена објави дека е подготвена да го продаде својот удел.