Цените на златото и среброто денеска се во пад, при што среброто забележа нагло намалување од повеќе од 10% по силна распродажба во Кина, во рамки на исклучително нестабилна седмица за пазарот на метали. Аналитичарите предупредуваат дека и во нарeдниот период се очекува висока волатилност на цените.
Цената на среброто изнесуваше 74,84 долари во 9:10 часот по источно време, што претставува пад од над 11%. Иако станува збор за остар пад, цената сепак беше над најниското ниво од 73,42 долари, кое металот го достигна претходно утрото.
И златото е во минус со пад од 2,2% во утринските часови, при што цената се стабилизираше на 4.841,30 долари.
Овој развој претставува значаен пресврт во однос на вторникот, кога и златото и среброто повратија дел од историските загуби од минатата седмица. Тогаш златото го забележа најголемиот еднодневен раст во речиси две децении, искачувајќи се на нешто повеќе од 4.900 долари, додека среброто порасна и до 15%, приближувајќи се до интрадневен максимум од околу 90 долари.
Аналитичарите на Saxo Bank изјавија за The Wall Street Journal дека падот на цената на среброто следел по „интензивна продажба“ во Кина. Според нив, со среброто веројатно ќе продолжи тргувањето со силни движења во двата правци.
Извршниот директор на Metals Daily, Рос Норман, во белешка објавена денеска ја посочи „претераната и еуфорична кинеска шпекулација“ како клучен фактор за нестабилноста на цените на металите. Тој оцени дека дел од инвеститорите се повлекуваат од пазар кој, како што наведува, „повеќе наликува на казино отколку на пазар“.