„Српска листа“ најави дека ќе ги бојкотира локалните избори на северот на Косово, кои претходно ги најави Вјоса Османи.
„Со оглед на одлуката на Приштина за одржување вонредни локални избори на северот на Косово и Метохија, сакаме да ја информираме јавноста дека „Српска листа“ нема да учествува на овие избори, а нема да учествуваат ниту граѓаните кои ја поддржуваат нашата партија, од кои над 95 отсто се на овие простори“, се наведува во соопштението.
Директорот на Канцеларијата за Косово, Петар Петковиќ, оцени дека вонредните избори за четири српски општини на север, без Србите и српскиот народ, немаат никаква смисла и како такви се осудени на пропаст, соопшти телото на Владата на Србија.
„Со едностраната одлука да се одржат некакви вонредни избори и дека во пресрет на големата слава на Свети Никола, властите во Приштина продолжуваат да вршат законско и институционално насилство врз Србите, кршејќи ја, меѓу другото, точката 11 од Бриселскиот договор“, предупреди Петковиќ во писмената изјава.
Според неговото мислење, ова е нов обид на Приштина да го окупира северот на Косово, „додека се крие зад некаков изборен процес во време кога со своите еднострани и незаконски постапки, Албин Курти, Вјоса Османи и нивните послушници дополнително ги зголемуваат тензиите на теренот“.