Српскиот премиер Милош Вучевиќ утре ќе престојува во официјална посета на Скопје, при што ќе се сретне со премиерот Христијан Мицкоски.
По средбата меѓу Вучевиќ и Мицкоски, предвидена е средба на делегациите на двете земји, а потоа потпишување на Меморандум за разбирање и соработка во областа на гасот меѓу Министерството за рударство и енергетика на Србија и Министерството за енергетика, рударство и минерални суровини на Северна Македонија, соопшти Владата на Србија.
Вучевиќ и Мицкоски ќе одржат прес-конференција, а потоа српскиот премиер ќе се обрати на собир на кој ќе присуствуваат претставници на српските здруженија, културно-уметнички друштва, политички партии и српски компании кои работат во Македонија.
Пред еден месец, на средбата во Белград со вицепремиерот, Иван Стоилковиќ, српскиот премиер порача дека двете земји немаат отворени прашања и дека ќе работат со Северна Македонија за зајакнување на регионот и влез во Европската унија.
Тогаш беше констатирано и дека се очекува формирање на Комисија за економска соработка, како и дека Србија и Македонија треба да соработуваат и по повод интерконекторот за снабдување со енергија.