Обвинителството за организиран криминал поднесе обвинение против министерот за култура во Владата на Србија, Никола Селаковиќ, во врска со незаконитостите при отстранувањето на статусот на културно добро од зградите на „Генералштабот“ во центарот на Белград.
На 15 декември, Обвинителството објави дека поднело обвинение и против секретарката на Министерството за култура, Славица Јелача, в.д. директорот на Републичкиот завод за заштита на спомениците на културата, Горан Васиќ, и в.д. директорот на Заводот за заштита на спомениците на културата на градот Белград, Александар Ивановиќ.
Сите се осомничени за кривични дела злоупотреба на службена должност и фалсификување службена исправа.
За потсетување, на местото на комплексот на Генералштабот, кој беше уништен за време на бомбардирањето на НАТО во 1999 година, планирана е изградба на луксузен комплекс од страна на инвестициската компанија „Афинити партнерс“ на Џаред Кушнер, зет на американскиот претседател Доналд Трамп.
Обвинителството, исто така, изјави дека „продолжува да презема мерки за да утврди дали дејствијата на други лица добиваат карактеристики на кривично дело“.
Обвинителството за организиран криминал од мај спроведe истрага за сомневања за фалсификување на документација врз основа на која српската Влада го поништи статусот на зградата на Генералштабот во Белград како културно богатство.
Според претходните обвинувања на Обвинителството, директорот на Републичкиот завод за заштита на спомениците на културата, Горан Васиќ, признал дека ја фалсификувал документацијата.
Врз основа на оваа документација, до Министерството за култура, на чело со Никола Селаковиќ од Српската напредна партија (СНС), е поднесена иницијатива за донесување одлука за прекинување на статусот на Генералштабот како културно богатство.
Никола Селаковиќ; Фото: Јутјуб/Принтскрин/Инсајдер
Селаковиќ беше испрашуван на 4 декември, а по давањето на сведочењето, тој не зборуваше за самата постапка, но упати обвинувања и навреди кон Обвинителството за организиран криминал.
Без да даде докази, тој ги обвини дека работат по наредба на неименувани центри на моќ, чија цел е соборување на владата во Србија и српскиот претседател Александар Вучиќ.
Српскиот претседател Александар Вучиќ на 11 декември објави дека доколку биде поднесено обвинение во случајот со Генералштабот, тој ќе ги помилува сите оние кои „наводно учествувале во измамата“.
„Нема да им дадам можност да ги гонат оние кои не се виновни. Јас сум виновен. Јас сум оној кој сакаше да ја модернизира Србија. Јас сум оној кој сакаше да донесе голем инвеститор“, рече Вучиќ.
Со посебен закон, усвоен од српскиот парламент на 7 ноември, со кој се одзема статусот на Генералштабот како културно добро, владата го расчисти патот за изградба.
На проектот се спротивставуваат антивладините демонстранти, опозицијата и експертите кои се залагаат за зачувување и реставрација на модернистичката зграда од 20 век, пренесе РСЕ.