Структурата на платите во Ливерпул е една од големите причини зошто играчи како Садио Мане сакаат да го напуштат клубот, а иднината на Мохамед Салах останува неизвесна. Платформата Sportac ги откри моменталните плати на играчите на Јирген Клоп. Доколку податоците се точни, со голо око е јасно дека на „Енфилд“ играчите земаат многу помали плати од клубови како Манчестер Јунајтед, Манчестер Сити и Челси. Највисока плата во Ливерпул моментално има Вирџил ван Дајк, кој инкасира 220.000 фунти неделно или 11.440.000 годишно. Тиаго Алкантара и Мохамед Салах се единствените други играчи од тимот од Мерсисајд кои достигнуваат 200.000 фунти неделно.
Според податоците, Сенегалецот според актуелниот договор добива само 100.000 фунти неделно или 5,2 милиони фунти годишно. „Билд“ пред два дена откри дека понудата на Баерн (Минхен) за напаѓачот е многу посериозна и доколку тој потпише со Баварците, Мане ќе добива над 20 милиони евра годишно. Истиот извор посочува дека Мане во преговорите со Ливерпул за нов договор од клубот побарал плата од околу 24 милиони евра годишно, што раководството на „црвените“ го одбило (Мане настојувал за плата од 393.000 фунти).
За споредба, Манчестер Јунајтед, каде се исплаќаат највисоките плати, има четворица играчи кои заработуваат над 300.000 фунти неделно. Тоа се Кристијано Роналдо (510.000), Давид Де Хеа (375.000), Џејден Санчо (350.000) и Рафаел Варан (340.000). Има тројца играчи во Манчестер Сити кои достигнуваат или ја преминуваат границата од 300.000 фунти неделно – Кевин Де Бруин (400.000), Џек Грилиш (300.000) и Рахим Стирлинг (300.000). Челси најмногу ги плаќа Ромелу Лукаку (325.000) и Н’Голо Канте (290.000).
Сето ова значи дека во наредните месеци раководството на Ливерпул мора да ја донесе тешката одлука или конечно да ја промени структурата на платите која толку тајно ја чува или да се збогува со уште еден свој иконски играч во лицето на Мохамед Салах.