Општина Пласница донела одлука на Минче Рамчески да му додели финансиска помош од 30.000 денари за храброст по напад од кафеава мечка. Финансиската помош на седумдесет и шестгодишниот Рамчески му ја додели градоначалникот на општината, Алија Јаоски.
-Денес општината одлучи на нашиот сограѓанин Минче Рамчески кој се најде во необична и застрашувачка ситуација да му додели финансиска помош од 30.000 денари за претрпен страв и неговата храброст. Тој ги искористи своите вештини и храброст и се одбрани од напад на мечка. Со ова, ги повикувам сите наши сограѓани и нашата дијаспора да се приклучат во овој хуманитарен напор и да донираат за поддршка на нашиот граѓанин Минче Рамчески во неговата борба да го надмине овој тежок период. Ниту еден придонес не е мал, и секоја помош ќе има значаен удел во неговото физичко и емоционално опоравување, објави Јаоски.
Минче сега е во добра состојба, но вели приказната немало да има среќен крај ако не биле ловците кои ја исплашиле и избркале мечката откако испукале куршуми во воздух.
Нападот врз Рамчески е причината поради која директорот на Центарот за управување со кризи, Стојанче Ангелов, доставил барање до институциите за отсрел на агресивни мечки.
Ангелов истакна дека ловот на мечката, иако е забранет со закон, но додава дека отстрелот на агресивни мечки е во согласност со Законот за лов, член 16 став 5. Министерството за земјоделство може да дозволи лов на заштитен дивеч, вклучително и на мечка, по прелиминарен мислење од Министерството животна средина.