Државниот секретар на министерството за одбрана на Србија Немања Старовиќ денеска изјави дека Турција интензивно работи на вооружување, обука и опремување на таканаречените косовски безбедносни сили.
Старовиќ за РТС посочи дека тоа е во спротивност со резолуцијата 1244 на Советот за безбедност на Обединетите нации, како и со Брисел и сите други релевантни договори.
„Секако дека интензивно ги следевме сите овие процеси, нашите агенции кои се надлежни за ова со месеци детално известуваа до државниот врв за се што се случува и секако согласно тоа, користејќи дипломатски канали, ние ги предупредија претставниците на Турција дека тоа што се случува е апсолутно неприфатливо. Секако, зборуваат за тоа дека се работи за некакви комерцијални аранжмани, за распродажби“, изјави Старовиќ.
Тој нагласи дека се работи за вооружување кое не е дозволено на Косово и дека не смеат да го поседуваат косовските безбедносни сили.
„Од друга страна, врз основа на сето она што го знаеме, имајќи го предвид буџетот што се издвојува за косовските безбедносни сили, тие немаат пари за такво нешто и не може да стане збор за комерцијални аранжмани и сосема е сигурно дека се работи за турски донации“, рече Старовиќ.
Тој додаде дека беспилотните летала биле јавно презентирани од Албин Курти и дека сега сите се свесни за тој факт.
Според Старовиќ, не станува збор само за беспилотни летала од типот Бајрактар, туку и за многу сериозни, софистицирани противтенковски системи, минофрлачи и фрлачи на гранати ОМТАС.
„Затоа, тоа го подига нивото на ризици и закани, пред се кон српското население што живее на Косово, но и кон Република Србија во целост“, вели Старовиќ.
Тој посочи дека тоа не е причина за паника, туку дека е кршење на меѓународното право за што, како што посочува, Белград има адекватни одговори.
Старовиќ рече дека некој треба да одговори на прашањето како е можно 24 години по завршувањето на војната, по усвојувањето на резолуцијата 1244, воено-техничкиот договор од Куманово, наместо демилитаризација на Косово, да имаме косовски безбедносни сили опремени со високо офанзивна опрема.