Јенс Столтенберг, кој наскоро ќе ја напушти функцијата генерален секретар на НАТО, објасни дека земјите-членки на НАТО треба да одлучат дали ќе ја поканат Украина да влезе во Алијансата додека дел од нејзината територија е окупирана.
Столтенберг рече дека сојузниците во НАТО треба да одлучат „како членството треба да се спроведе или да работи за Украина“.
„Се разбира, ако кажеме дека единствениот начин Украина да стане членка е војната да заврши и Украина да има целосна контрола врз целата украинска територија, тогаш на рускиот претседател Владимир Путин му го даваме секој поттик да најде начин да продолжи со војната“, рече Столтенберг.
Како што додава, неговата главна порака е дека безбедносните гаранции на НАТО се начин да се обезбеди траен и праведен мир за Украина.
На прашањето дали Украина може да стане членка на НАТО со делумно окупирани територии, Столтенберг одговори дека „тоа треба да одлучат сојузниците на НАТО. И, се разбира, на сојузниците на НАТО е да одлучат дали гаранциите од член 5 можат да се применат на делови од украинската територија“, нагласи тој.