Генералниот секретар на НАТО, Јенс Столтенберг изјави дека воената алијанса „внимателно ги следи“ руските нуклеарни сили, додавајќи дека „намерниот напад врз критичната инфраструктура на сојузникот“ ќе биде одговорен со „унифициран и решителен одговор“.
Говорејќи на прес-конференција за војната во Украина, Столтенберг рече дека „прикриените нуклеарни закани“ на Путин се „опасни и неодговорни“, додавајќи дека Кремљ знае дека „нема победници во нуклеарна војна“.
„Внимателно ги следиме нуклеарните сили на Русија. Засега не видовме никакви промени, но остануваме будни“, рече Столтенберг.
Првиот човек на НАТО рече дека Северноатлантската алијанса го удвоила бројот на борбени групи на исток, додавајќи дека силата на тие групи може брзо да се зголеми.
„Сојузниците ја зголемуваат безбедноста околу клучните инсталации и сè повеќе споделуваат разузнавачки информации. Ќе преземеме чекори за зајакнување на нашата отпорност и заштита на нашата критична инфраструктура. Секој намерен напад врз критичната инфраструктура на сојузниците ќе биде проследен со обединет и решителен одговор“, рече Столтенберг.
Генералниот секретар на НАТО вели дека Украина има „моментум“ во војната со Русија, која „се повеќе се потпира на ужасни напади врз цивили и критична инфраструктура“.
„Претседателот Путин ја започна оваа војна. Тој мора да ја заврши со повлекување на своите сили од Украина. Што се однесува до претседателот на Белорусија Лукашенко, тој мора да го запре учеството на неговата земја во овој нелегален конфликт“, заклучи лидерот на НАТО.