Домашниот натпревар на Наполи против Барселона во Лигата на шампионите може да испадне како последен натпревар на Валтер Мацари на чело на тимот, тврди Газета дело Спорт. Според изданието, при разочарувачки настап во пресметката со Каталонците, искусниот тренер најверојатно ќе биде ослободен од функцијата.
По лошиот почеток на сезоната од страна на италијанскиот шампион, Мацари го замени својот претходник Руди Гарсија во ноември. Сепак, тоа не доведе до подобрување на перформансите и резултатите на „небесносините“ кои се само на деветтото место во Серија А со 36 бодови или дури 9 надвор од зоната на Лигата на шампионите.
Договорот на 62-годишниот стручњак е само до лето, но може да биде раскинат веќе следната недела. Доколку тоа се случи, фаворит за нов тренер е Марко Џампаоло, кому исто така би можел да му биде понуден договор до крајот на сезоната. Досега раководел со екипите на Каљари, Сиена, Катанија, Чезена, Кремонезе, Емполи, Сампдорија, Милан и Торино.
Осминафиналето на Лигата на шампионите меѓу Наполи и Барселона се игра на стадионот „Диего Армандо Марадона“ во среда од 21:00 часот.