Судот на БиХ побара распишување меѓународна потерница за претседателот на ентитетот Република Српска, Милорад Додик и претседателот на Народното собрание на РС, Ненад Стевандиќ, откако ја преминале државната граница, а се дознава дека по нив веќе е распишана внатрешна потерница.
Судот на БиХ соопшти дека на 26 март добиле предлог од Обвинителството на БиХ за распишување меѓународна потерница за осомничените Милорад Додик и Ненад Стевандиќ.
„Основата за усвојување на истиот, во предлогот што беше прифатен, Обвинителството со право ја засноваше својата одлука на очигледните постапки на осомничените Додик и Стевандиќ, кои користејќи ги високите позиции во субјектот Република Српска, ги избегнаа законски пропишаните процедури за гранична контрола, ја преминаа државната граница и ја напуштија државата Босна.
Се дознава дека осомничениот Додик моментално се наоѓа во Израел, додека осомничениот Стевандиќ, избегнувајќи ги законски пропишаните контроли, дури на 18 март 2025 година се вратил во БиХ, а сето тоа укажува на веројатноста во секој момент (повторно) да се најде во странство.
„Ова е основа за постапување според член 446, став 2, од ЗКП на БиХ и за издавање наредба за распишување меѓународна потерница, која Судот ја издаде“, велат оттаму.
Судот забележува дека издавањето налози за апсење спаѓа во јурисдикција на НЦБ на Интерпол.
Додик во понеделникот ја помина државната граница на Босна и Херцеговина за прв пат откако по него беше распишана потерница. Ова, како што беше претходно објаснето од правен аспект, отвора можност за поведување постапка за распишување меѓународна потерница. По краткиот престој во Србија, Додик веднаш го продолжил патувањето за Израел каде што моментално се наоѓа.
Додик и Стевандиќ, заедно со премиерот на ентитетот РС, Радован Вишковиќ, се осомничени во случајот што го води Обвинителството на Босна и Херцеговина, а се однесува на кривичното дело уривање на уставниот поредок. По нив неодамна беше распишана потерница, но беше оценето дека класичната постапка за притвор ќе носи преголем безбедносен ризик.
Исто така, важно е да се истакне дека Вишковиќ досега не ја поминал државната граница, поради што по него не е побарана потерница од Интерпол, пишува „N1 БиХ“.