Тренерот на Барселона, Ханси Флик, во саботата на мечот со Реал Бетис (2:2) го заработи првиот црвен картон во својата тренерска кариера, а сега се знае дека поради тоа ќе биде суспендиран на два натпревари во Ла Лига.
Тоа значи дека Германецот ќе мора да чека дури 56 дена за да се врати на клупата на Блауграна пред домашната публика, бидејќи поради гостувањата во Лигата на шампионите, Купот на кралот и шпанскиот Суперкуп повторно ќе има можност да го води својот тим на Монжуик дури на 26 јануари во дуел со Валенсија.
Поранешниот селектор на германската репрезентација „поцрвене“ поради неговиот револт во моментот кога судијата покажа на пенал за Бетис. Тој незадоволно замавна со раката и нешто искоментира, по што судијата веднаш го исклучи од теренот.
Судијата Алехандро Муниз Руиз во својот извештај напиша дека Флик бил исклучен затоа што „го напуштил просторот наменет за тренери, викал и гестикулирал во знак на протест против една од одлуките“.
Поранешниот стратег на Баерн по мечот изјави дека не кажал ништо упатено кон судијата и дека поради нервозата за ситуацијата во која се најде неговиот тим „зборувал сам со себе“.
Тој ја пофали и формата што ја покажува Ламин Јамал, кој асистираше за вториот гол на Барселона, по враќањето од повредата.
„Јамал е фантастичен талент, тој може да донесе предност во секој момент. Тој по повредата полека се враќа на потребното ниво на кондиција, но во последните неколку натпревари покажа од што е направен и колку е важен за целиот тим. Имам целосна доверба во него и сигурен сум дека тоа ќе го оправда“.
Барселона денеска гостува кај Борусија Дортмунд во Лигата на шампионите, а потоа го пречекува Леганес во шпанското првенство под палката на помошникот на Флик, Маркус Сорго.