Косовскиот министер за внатрешни работи во технички мандат, Џељаљ Свечла, тврди дека наводите за вчерашниот инцидент во Северна Митровица, кога, како што може да се види на видеа од социјалните мрежи, косовски полицаец нападнал српски матурант, се „српска пропаганда“.
„Вака изгледа српската пропаганда: Барањето на полицаецот групата да не ги провоцира граѓаните за да не ескалира ситуацијата е насилство, а ставањето раце го нарекуваат задушување. Своите изрази на екстремизам и шовинизам ги нарекуваат прослава, додека црвената боја што ја користеле за да сликаат разни фигури на нивните тела се обидуваат да ја прикажат како крв. Ништо ново од нив“, напиша Свечла на Фејсбук.
Тој додаде дека оваа „пропаганда може да има влијание само врз неинформираните и националистичките кругови во Србија“.
Сепак, според видеата што кружат на социјалните мрежи, вчерашниот инцидент се случил во пешачката зона во Северна Митровица, во близина на главниот мост на Ибар, а на нив може да се види дека припадник на косовската полиција се нафрла врз српски матурант и при тоа го зграпчува за вратот во неколку наврати, пишува „Косово онлајн“.