Варшавскиот надбискуп побара од Ватикан да го расчини свештеникот обвинет за убиство на 68-годишен бездомник, кој бил удрен со секира и потоа запален, јавија полските медиуми.
Обвинителите во саботата го обвинија католичкиот свештеник, идентификуван само како Мирослав М. во согласност со полските правила за приватност, за убиство со посебна суровост. Судењето ќе чека во притвор. Тој се соочува со 15 години до доживотна казна затвор.
Истражителите велат дека свештеникот и жртвата Анатол Ч., биле заедно во автомобил минатиот четврток, кога избила кавга.
Спорот настанал поради договорот со кој свештеникот се согласил да пружа доживотна помош и грижа на жртвата, изјави Анета Гожѓ, портпаролка на Окружното обвинителство во Радом. Таа додава дека спорот ескалирал околу идното сместување на бездомникот.
Свештеникот ја удрил жртвата со секира по главата, ја полил со запаллива течност и ја запалил. Потоа се оддалечил од местото на настанот бидејќи видел светло на велосипед што се приближувал. Велосипедист ја пронашол жртвата во пламен и повикал Брза помош.
„Обдукцијата покажа дека жртвата претрпела изгореници кои покриваат 80% од телото и повреди на главата предизвикани од тежок предмет со остар раб“, рече Гожѓ.
Варшавскиот надбискуп Адријан Галбас во саботата побарал од Светата Столица да го расчини свештеникот, односно да му го одземе свештеничкиот чин, што е највисоката казна во канонското право за клерик.