Напорите на јавните здравствени служби за ограничување на употребата на тутун ширум светот напредуваат, според Светската здравствена организација (СЗО) во новиот објавен извештај, а сè поголем број земји преземаат мерки против пушењето, пренесува агенцијата Хина.
Сега 5,6 милијарди луѓе живеат во земјите во светот кои имаат имплементирано барем една од препорачаните мерки на СЗО за заштита на непушачите, се вели во најновиот извештај на групата за епидемијата на тутун, што го пренесуваат светските агенции. Во речиси 40 отсто од земјите, затворените јавни простори сега се без чад.
Организацијата, сепак, критикуваше некои земји што не преземаат дополнителни чекори за ограничување на употребата на тутун и спроведување на постоечките правила.
Според СЗО, повеќе од осум милиони луѓе годишно умираат од пушење, повеќето од нив во земјите со низок и среден приход.
Според СЗО, чадот од тутун има големо влијание и врз непушачите. Организацијата припишува 1,2 милиони смртни случаи секоја година – вклучувајќи ја и смртта на 65.000 деца – на изложеност на пасивно пушење. Луѓето кои се изложени на пасивно пушење се изложени на ризик од смрт, срцеви заболувања, мозочен удар, респираторни заболувања, дијабетес тип 2 и рак.
Напредок по држави
Ефективните мерки за спречување на пушењето ќе обезбедат помалку луѓе да заболат од рак, кардиоваскуларни болести или респираторни проблеми, кои се предизвикани од пушењето, рече Рудигер Крех, директор на СЗО за промоција на здравјето.
Извештајот го оценува напредокот на земјите во контролата на тутунот и покажува дека уште две земји, Маурициус и Холандија, постигнале највисоко ниво на имплементација од сите мерки на СЗО, подвиг што досега успеале да го постигнат само Бразил и Турција. Осум земји треба да спроведат само уште една мерка за да им се придружат на лидерите во контролата на тутунот: Етиопија, Иран, Ирска, Јордан, Мадагаскар, Мексико, Нов Зеланд и Шпанија.
Во извештајот се наведува дека во 53 земји се уште нема целосна забрана за пушење во здравствените установи. Само околу половина од земјите имаат работни места во приватни компании и ресторани без чад.