243
Во понеделникот вечерта, полицијата приведе возач на камион кој со своето возило удрил во безбедносните бариери на плоштадот Лафајет пред Белата куќа во Вашингтон, изјави портпаролот на американската тајна служба.
„Во инцидентот нема повредени, а причината и другите детали за овој инцидент се истражуваат“, објави портпаролот на американската тајна служба Ентони Гуглиелми на својот Твитер профил и додаде дека некои патишта и пешачки патеки се затворени во областа, пренесува „Ројтерс“.
Блискиот хотел „Хеј Адамс“ беше евакуиран на барање на Тајната служба, објави „Вашингтон пост“, а телевизијата VUSA во живо прикажа видео од камион U-Haul покрај редот челични столбови, со униформирани полицајци и полициски кучиња во близина на возилото.