Министерството за одбрана на Тајван денеска соопшти дека вкупно 68 кинески воени авиони и 13 бродови на морнарицата изведуваат вежби во чувствителниот тајвански теснец и дека некои од нив „намерно“ преминале на таканаречената „средна линија“, територија која во пракса се смета за линија на разделување, пишува британски Гардијан.
Во соопштението, Министерството ја осуди Кина, наведувајќи дека нејзините вооружени сили „сериозно ја оштетиле“ моменталната ситуација и го „нарушиле“ водениот и воздушниот простор на Тајван.
Министерот за надворешни работи на Тајван Џозеф Ву на Твитер напиша дека „Кина извршила рекордни 68 летови со воени авиони и испратила 13 воени бродови околу Тајван“.
#China carried out a record 68 sorties by warplanes & sailed 13 warships around #Taiwan. Many crossed the median line of the strait to simulate attacks. This dangerous escalation of the military threat is wrecking peace & stability in the region & must be condemned. JW https://t.co/ovZNVvCEnZ
— 外交部 Ministry of Foreign Affairs, ROC (Taiwan) 🇹🇼 (@MOFA_Taiwan) August 5, 2022
„Многу од нив ја преминаа средната линија на теснецот за да симулираат напади. Оваа опасна ескалација на воената закана ги уништува мирот и стабилноста во регионот и мора да биде осудена“, напиша тој.
Денеска Кина продолжи со воените вежби во близина на Тајван по посетата на американската политичарка Ненси Пелоси на овој остров.
Кинеската војска соопшти дека спровела воздушни и поморски борбени вежби на север, југозапад и исток на Тајван и продолжува да ги „тестира заедничките борбени способности на војниците“.