Србија би можела да биде блокирана во процесот на пристапување во Европската унија доколку нејзиниот претседател Александар Вучиќ следниот месец отпатува во Русија на парадата за Денот на победата, пишува Телеграф.
Руските државни медиуми објавија дека Александар Вучиќ ќе биде еден од странските достоинственици на настанот, како и дека Србија ќе учествува со воени единици и опрема на спектаклот на 9 мај. Како одговор, европските претставници го предупредија Вучиќ дека неговата посета ќе биде кршење на критериумите за членство во ЕУ и со тоа ќе ги загрози европските амбиции на Србија.
„Мораме јасно да им ставиме до знаење дека одредени одлуки имаат своја цена“, изјави Џонатан Всевиов, генерален секретар на естонското Министерство за надворешни работи. Последицата е тоа што нема да влезат во Европската Унија.
„Русите многу напорно се трудат да доведат странски гости… Ова ќе биде важен тест за нас. Во суштина, бараме да видиме дали тие се на наша страна или играат за другиот тим“.
Учеството на парадата во Москва беше тема на разговор на министрите на ЕУ
Каја Калас, главниот европски дипломат, рече дека министрите за надворешни работи на ЕУ на вчерашната средба разговарале за учеството на земјите кандидати на церемонијата во Москва.
„Се разговараше многу јасно и неколку земји-членки рекоа дека секое учество на паради или прослави на 9 мај во Москва нема да биде сфатено лесно од европската страна, имајќи предвид дека Русија води вистинска, сеопфатна војна во Европа“, изјави таа за новинарите по состанокот.
Србија долго време се обидува да одржува добри односи и со Брисел и со Москва.
Таа поднесе барање за членство во ЕУ во 2009 година, а доби кандидатски статус во 2012 година.
Белград одби да воведе западни санкции кон Русија како одговор на војната, која повеќето земји-членки на ЕУ ги бараат како услов за членство. Русија е сопственик на единствената српска рафинерија за нафта и одбива да ја продаде, поради што Србија е економски зависна од Москва.
Каја Калас беше принудена да ги предупреди другите членки на ЕУ да не учествуваат на парадата на Денот на победата на Путин, која оваа година ја одбележува 80-годишнината од поразот на нацистичка Германија во Втората светска војна.
Поканета и Словачка
Словачка, членка на ЕУ со блиски врски со Москва, исто така е поканета на настанот следниот месец.
Роберт Фицо, премиерот на Словачка, минатата година рече дека ќе присуствува и е еден од ретките лидери на ЕУ кои се сретнале со Путин во повеќе од три години откако Русија ја нападна Украина.
Унгарскиот премиер Виктор Орбан, кој важи за најблизок сојузник на Путин во Европа, нема да присуствува.
„Ги повикав сите членки, како и претставници на институциите, да го посетуваат Киев што е можно почесто за да ја покажеме нашата солидарност и дека сме со Украина“, рече Калас.