Напаѓачот на Манчестер Јунајтед, Алехандро Гарначо има потенцијал да стане играч од светска класа доколку продолжи да работи напорно, изјави менаџерот Ерик тен Хаг пред саботното гостување во Премиер лигата во Брајтон.
Гарначо (20) му асистираше на деби голот на напаѓачот на Јунајтед Џошуа Зиркзе во првата победа од 1-0 против Фулам во лигата и постигна гол во „Комјунити Шилд“ против Манчестер Сити, кој „црвените ѓаволи“ го загубија на пенали.
Репрезентативецот на Аргентина, заедно со Коби Мајну, постигна гол и во победата на Манчестер Јунајтед од 2-1 над Манчестер Сити во финалето на ФА Купот минатата сезона.
„За да го направи тој скок за да биде фудбалер од светска класа, тој има долг пат пред него. Започнува со напорна работа. Тоа го доведе таму каде што е сега и ќе го доведе да стане играч од светска класа бидејќи се согласувам дека има потенцијал“, изјави Тен Хаг за медиумите.
„Ни требаат одлични играчи, но мислам дека на секој тим на врвот му треба светла ѕвезда. Гарначо дефинитивно има сила да биде таков“, додаде тој.
Играчот од средниот ред на Јунајтед, Коби Мајну (19) ја заврши кампањата на Англија на Евро 2024 како клучен играч во тимот на поранешниот менаџер Герет Саутгејт, а Тен Хаг рече дека искуството ги усовршило неговите вештини.
„Овие искуства само ќе му помогнат да стане подобар играч оваа сезона. Совршен играч за врска е оној кој е многу добар во нападот и многу добар во одбраната. Тој е фудбалер кој може да го направи тоа и може да игра како офанзивен играч за врска и како дефанзивен играч од средниот ред“, прокоментира менаџерот на „црвените ѓаволи“.