Десетици медицински сестри и техничкиот персонал од Клиничката болница во Тетово денеска повторно протестираа поради нерешените работни статуси и задоцнетите плати. Вработените велат дека веќе три месеци не примиле плата и иако го одржуваат функционирањето на болницата, не добиваат никаква поддршка. „Ние не бараме подарок, туку само да си ги добиеме задоцнетите плати и договорите што ни беа ветени. Доста е од лаги“, изјави Фљутурие Ислами, една од протестирачките.
Додека здравствените работници протестираа пред болницата, директорот Агим Бериша се затвори во својата канцеларија и не сакаше да даде изјава за медиумите, а вратата ја чуваа назначени лица. Главната медицинска сестра, Дита Заими, која застана на страна на директорот, објасни дека проблемите се наследени од претходното раководство и дека се чека нов министер за здравство кој ќе може да ги реши.
„Ова се проблеми кои не се од денес, туку наследени. Министерството ни ветило конкурси за решавање на статусот на вработените и се надеваме дека наскоро ќе се најде решение“, рече Заими и ги повика вработените да формираат работна група и да ги достават своите барања во писмена форма. Горан Ристевски, претставник на болницата, посочи дека во установата има околу 400 технички работници и 140 медицински сестри кои работат со договори, но и покрај тоа, со целосно решавање на нивниот статус, ќе остане недостиг од кадар.
Независниот медицински синдикат на Македонија потврди дека врши притисок за решавање на проблемот и најави дека наскоро ќе ја поддржат акцијата на вработените, истакнувајќи дека слични проблеми постојат во повеќето болници низ земјата.