Тренерот на Јувентус, Тиаго Мота категорично ги отфрли гласините за отказ, нагласувајќи дека ја има целосната поддршка од раководството на клубот. Медиумите на Апенините практично го заменија по завршувањето на сезоната, објавувајќи листа на кандидати…
Сепак, според Мота, неговата работа е сигурна и по дебаклот против Аталанта (0:4).
„Размислувам само за Фиорентина. Имам целосна доверба во клубот и ја ценам поддршката од сопствениците во текот на оваа недела. Мојата иднина не е приоритет, туку следниот натпревар, каде што треба да се претставиме одлично. Во нашата работа тренерот е секогаш под лупа и тоа е сосема оправдано. Јас сум првиот што си поставува прашања, анализирајќи ја нашата работа секој ден“, започна Мота.
Тој е оптимист и гледа позитивно на работите.
„Најтешко, но и најважно е да се остане смирен за објективно да се согледа ситуацијата. Многу работи направивме добро, а некои работи можеме да ги подобриме. Комуникацијата со клубот е континуирана и постојана. Ја ценам поддршката што ми ја дадоа сопствениците оваа недела. Јас сум првиот што се преиспитувам и тоа е нормално кога работите не одат како што треба. Сега е одлична можност повторно да ја покажеме нашата вредност“, порача тој.
Нема сомнеж дека Јуве го чека тежок натпревар против Фиорентина, традиционалниот спортски непријател.
„Како и секогаш, играњето во Фиренца ќе биде тешко и предизвикувачко. Очекувам Фиорентина да биде на најдобро ниво. Знаеме дека тие се одличен тим со тренер кој врши добра работа и квалитетни играчи. Многу пати игравме добро и победивме во клучните натпревари. Во други случаи не успеавме и имавме потешкотии. Нашиот најважен натпревар е пред нас, бидејќи е следниот. Ни претстои тежок противник и мора да дадеме се од себе за да победиме“, заврши Бразилецот.