Демократски избраната белоруска влада нема да смета дека е валиден ниту еден иден меѓународен договор склучен со белорускиот претседател Александар Лукашенко, рече лидерот на опозицијата Свјатлана Тихановскаја во обраќањето од Литванија денеска.
„Државите или (договорните) страни … не можат и не треба да очекуваат Белорусите и нивната чесно и демократски избрана влада да прифатат договори направени против нивна волја од нелегалниот режим“, рече Тихановскаја во видео обраќањето.
„Лукашенко нема легитимитет да биде претседател на нашата земја. Тој повеќе не ја претставува Белорусија“, рече таа пред комитетот на Советот на Европа во обраќањето од Вилнус, Литванија, каде што избега од својата татковина поради закани по изборите во август, каде таа беше противник на Лукашенко.
Литванскиот министер за надворешни работи во понеделникот изрази загриженост дека Лукашенко може да се откаже од независноста на Белорусија со потпишување договор за посилна интеграција со Русија.
Лукашенко се соочува со масовни протести и повик да се повлече по изборите што Европската унија исто така ги нарече нефер.