Четиринаесетгодишен малолетник, познат на полицијата по претходни прекршоци, завчера предизвикал силна експлозија во станбена зграда во Берлин, откако фрлил запалива направа на балкон. Нападот, според првичните информации, бил насочен кон врсник кој живее таму со мајката и сестрата, пренесуваат германските медиуми.
Берлинската полиција соопшти дека инцидентот се случил околу 7:35 часот на улицата Фојхтвангервег, во населбата Нојкeлн. Сведок видел како тинејџер фрла предмет на балкон во приземје и веднаш потоа бега од местото на настанот.
Набргу потоа следела силна експлозија. Балконот бил зафатен од пламен кој се проширил по фасадата до шестиот кат. Прозорците во погодениот стан и во станот над него биле искршени, а пожарот се проширил и во внатрешноста. Во моментот на експлозијата во станот се наоѓале 14-годишно момче и неговата 53-годишна мајка, кои вдишале чад.
Според информациите, осомничениот подолго време го малтретирал тинејџерот чиј стан бил цел на нападот. Пожарникарите брзо реагирале и успеале да го изгаснат пожарот и да спречат негово проширување на останатиот дел од зградата. Полицијата го уапсила осомничениот во близина, врз основа на опис од сведоци. Мајката и синот биле пренесени во болница, каде што и вчера биле на лекување.
Полицијата наведува дека 14-годишникот е рецидивист и против него ќе биде издаден налог за притвор. Тој се истражува за тешко кривично дело подметнување пожар. Делумно изгорениот стан е ограден и запечатен.
Соседите сведочат дека експлозијата се почувствувала низ целата зграда, а дел од нив посочуваат дека можеби станувало збор за бомбеста направа со кружна форма. Германските медиуми пишуваат дека во погодениот стан живее 53-годишна самохрана мајка со својот 14-годишен син и 18-годишна ќерка, а целта на нападот наводно бил помладиот син, кој подолго време бил изложен на малтретирање од сега уапсениот напаѓач. Истрагата е во тек.