Легендата на американскиот фудбал, Том Брејди се уште не одлучил дали претстојната сезона во НФЛ ќе биде последна во неговата кариера. 44-годишниот бек на Тампа Беј, кој има роденден во август, се повлече од спортот по крајот на минатата сезона, но ја смени својата одлука само еден месец подоцна.
Брејди има седум победи во „Супер Боул“ со Њу Ингланд и Тампа. Тој наскоро ќе ја започне својата 23-та НФЛ сезона и трета со Тампа Беј.
„Физички се чувствувам прилично добро. Имав многу повреди низ годините, но се надевам дека следната ќе помине без проблеми и ќе победувам“, изјави Брејди за Variety.
„Ја донесов одлуката (да се пензионирам) рано. Мислев дека тоа е за доброто на тимот и им го кажав тоа. Но понекогаш ви треба повеќе време за планирање. По разговорите со Брус Аријанс (тренер), Џејсон Лихт (генерал менаџер) и мојата сопруга (моделот Жизел Бундхен) одлучивме дека сè уште можам да играм на највисоко ниво. Преферирав да размислувам до јули дали ќе играм повторно, но работите се случија порано. Сакав да му дадам време на тимот да прави планови и поради тоа пребрзо ја донесов одлуката. Меѓутоа, подоцна сфатив дека можам да продолжам бидам на терен“.
Набргу по неговото враќање, Брејди потпиша 10-годишен договор вреден 375 милиони долари со Fox Sports, каде што ќе служи како главен коментатор и аналитичар. Договорот ќе стапи на сила по конечното пензионирање на бекот, без разлика кога тоа ќе се случи.
„Дали ова може да биде мојата последна година? Апсолутно. Дали би можел повторно да се предомислам? Апсолутно. Можеби нема да ми преостануваат уште пет години и свесен сум за тоа, но мојата кариера ќе продолжи да се развива како што сакам. Ќе продолжам да давам се од себе и ќе видиме што ќе се случи“, продолжи тој.
Брејди заклучи велејќи дека доколку освои уште еден „Супер Боул“, тогаш одлуката за пензионирање ќе биде многу полесна. Во јануари, Бакс изгубија од идниот шампион Лос Анџелес Рамс во плејофот на Националната фудбалска конференција.
„Очигледно, тоа е најдобриот начин да ја завршите кариерата. Едноставно сум преамбициозен, а тоа преовладува кај мене“, изјави Брејди.