Високите температури кои моментално ја погодуваат Европа сигурно ќе продолжат да растат, а со нив и ризикот од срцев удар и смрт.
Топлотниот бран што ја зафати северната хемисфера се очекува да се засили оваа недела, што ќе предизвика пораст на ноќните температури и ќе доведе до зголемен ризик од срцев удар и смрт, соопшти во вторникот Светската метеоролошка организација (WMO).
Температурите во Северна Америка, Азија и низ Северна Африка и Медитеранот ќе бидат над 40 степени целзиусови неколку дена оваа недела, бидејќи топлотниот бран се засилува, се вели во соопштението на WMO.
Ноќните минимуми ќе достигнат нови врвови, според WMO, создавајќи ризик од зголемување на срцеви удари и смртни случаи.
Иако најголем дел од вниманието е насочено кон максималните дневни температури, токму ноќните температури носат најголеми здравствени ризици, особено за ранливите групи, предупредува WMO.
Зборувајќи за новинарите во Женева, научник специјализиран за проучување на топлотните бранови рече дека високите температури што моментално ја погодуваат Европа сигурно ќе продолжат да растат.
Медитеранскиот топлотен бран е голем, но ништо како оној во Северна Африка, изјави Џон Наирн, виш советник на WMO за екстремни горештини. Во оваа фаза се развива во Европа.
Врвот на топлотниот бран во Европа се очекува на италијанските острови Сицилија и Сардинија. Според Европската вселенска агенција (ESA), температурите на тие острови би можеле да достигнат 48 степени Целзиусови.
Европскиот рекорд го држи Сицилија, каде во 2021 година се измерени 48,8 степени Целзиусови.