Министерот за внатрешни работи, Панче Тошковски, вели дека при снабдувањето со нови униформи за полицијата, тие постапуваат според законот. Во изјава за медиумите, во врска со критиките за имплементацијата на албанскиот јазик на униформите, Тошковски рече дека ДУИ имала можност да го спроведе правилникот додека бил на сила.
„Овој закон е донесен од 2018 година. ДУИ имаа можност во минатото да ја покаже неговата имплементација. Чекорите што се преземаат од наша страна се дека целосно постапуваме според законот и според прописите што важат. Ќе кажам повторно, овој правилник е донесен во време кога ДУИ и СДСМ беа на власт во Македонија“, рече Тошковски, меѓу другото.
Демократската унија за интеграција ја изразува најдлабоката индигнација за скандалозната одлука за новите полициски униформи да бидат само на македонски јазик.
-Овој чин претставува флагрантно кршење на принципите на Охридскиот договор и на Законот за употреба на јазиците, кој гарантира еднаквост и двојазичност во државните институции, особено на полициските униформи, се наведува во соопштението од ДУИ.