Во сезона која навивачите на Тотенхем би сакале што побрзо да ја заборават, клубот од северен Лондон минува низ турбулентен период – и на теренот и надвор од него. Спарс моментално се наоѓаат на 16. место во Премиер лигата, а опстанокот во елитата го обезбедија дури во последното коло.
Формата на тимот во последните пет кола дополнително ја нагласува длабочината на кризата – четири порази и само една победа, и тоа против последнопласираниот Саутемптон. Сепак, трошка надеж останува во европското натпреварување: Тотенхем се пласираше во полуфиналето на Лига Европа, каде што ќе се соочи со норвешкиот Бодо/Глимт. Победникот од тој двомеч ќе игра во финалето против подобриот од дуелот меѓу Манчестер Јунајтед и Атлетик Билбао.
Освојувањето на Лигата на Европа не само што би значело прв трофеј по 2008 година – кога Спарс го совладаа Челзи со 2-1 во финалето на Лига купот – туку би донело и директен пласман во Лигата на шампионите. Тоа би била значајна финансиска инјекција за клубот, особено по неуспесите на домашната сцена оваа сезона.
Слабите резултати го отворија и прашањето за иднината на тренерот Анже Постекоглу. Австралиецот сè почесто дава сигнали дека е свесен за можниот крај на својата епизода на клупата. Британскиот The Sun објави дека раководството на клубот, вклучително и претседателот Даниел Леви, веќе има јасна визија за негов наследник – Скот Паркер.
Паркер, поранешен играч на Тотенхем, моментално го води Барнли и штотуку обезбеди промоција во Премиер лигата со победа над Шефилд Јунајтед. Иако неговите претходни ангажмани во елитата со Фулам и Бурнемаут не оставија посебен впечаток, во таборот на Спарс се смета за еден од најперспективните млади англиски тренери.