Продолжува судењето на лекарите обвинети за ненамерно убиство на Диего Армандо Марадона, а сведочењето на лекарот кој се грижел за легендарниот Аргентинец ги шокираше присутните во судницата во Буенос Аирес.
Колин Кембел, член на обезбедувањето на Марадона, кој беше повикан критичната ноќ, откри дека во домот на Диего немало дефибрилатор или друга медицинска опрема, што е од суштинско значење за закрепнување на пациент кој неодамна бил опериран.
„Куќата беше во ужасна состојба, особено просторијата во која беше Марадона. Немаше основна хигиена или медицинска опрема. По пристигнувањето најдов медицинска сестра која се обидува да го реанимира 60-годишниот Диего, но тој беше мртов долго време – најмалку два часа“, изјави Кембел.
Овие сведоштва ги потврдил лекарот Хуан Карлос Пинто, кој пристигнал малку подоцна со својот тим за итна помош.
„Марадона беше мртов повеќе од два часа. Во неговата соба немаше опрема за помош при реанимација – ниту кислород, ниту дефибрилатор“, нагласи Пинто.
Од полицијата ги потврдија овие изјави на медицинскиот персонал. Во судењето обвинети се медицинските сестри на Марадона, како и неговиот неврохирург и психијатар. Судскиот процес против седумтемина осомничени започна на 11 март.
Судењето се очекува да трае уште неколку месеци, а на осмиот обвинет ќе му се суди посебно во јули.
Како што е познато, Диего Марадона почина во својот дом на 25 ноември 2020 година од срцева слабост додека се опоравуваше од операција за отстранување на згрутчување на крвта извршена неколку дена порано.