Во редок вербален напад од Овалната соба, претседателот Доналд Трамп во понеделникот јавно ја нападна новинарката на Си-Ен-Ен, Кејтлан Колинс за време на прес-конференцијата во која беше и претседателот на Ел Салвадор, Најиб Букеле.
„Нема да започнеме со Си-Ен-Ен бидејќи тие секогаш грешат“, започна Доналд Трамп, одбивајќи да го даде првото прашање на новинарката од познатата американска телевизија, Кејтлан Колинс.
Откако другите новинари добија можност да поставуваат прашања, претседателот сепак покажа кон Колинс, но со навредлив коментар: „Ајде да слушнеме прашање од овој водител на CNN со многу низок рејтинг“.
Колинс се обиде да постави прашање за случајот на Килмар Абрего Гарсија, 29-годишник од Ел Салвадор, кој беше депортиран од САД во март, и покрај тоа што доби заштита од депортација од судија за имиграција во 2019 година. Врховниот суд нареди на администрацијата на Трамп да му дозволи да се врати во Мериленд.
Наместо сам да одговори на прашањето, Трамп им го упати прашањето на својата јавна обвинителка Пем Бонди и заменик-шефот на кабинетот Стивен Милер, а потоа го нападна новинарот: „Колку долго треба да одговориме на ова прашање? Зошто не кажете само, зарем не е прекрасно што ги држиме криминалците надвор од нашата земја?“
Кога Колинс инсистираше да одговори дали ќе ја почитува одлуката на Врховниот суд, Трамп продолжи со своите напади: „Затоа веќе никој не ве гледа, немате кредибилитет“.
За време на конференцијата, Трамп, исто така, тврдеше дека постои „99,1 процент“ ефективност во спроведувањето на границите на јужната граница на САД, а потоа ги обвини медиумите, особено CNN, дека „ја мразат нашата земја“ затоа што не известуваат за овие успеси.
Водителката на Си-Ен-Ен, Дејна Баш подоцна ги отфрли тврдењата на претседателот, нагласувајќи: „Си-Ен-Ен не ја мрази нашата земја, тоа треба да биде очигледно“.
Во неодамнешното интервју за Vanity Fair, Колинс се опиша себеси како „весела воинка“ и покрај вербалните напади на претседателот, нарекувајќи ја неговата критика „техника за одвлекување на вниманието“.
„Нема слободни денови. Не можете да имате опуштен петок, а ако некогаш мислите дека ќе биде релаксиран, гарантирам дека нема да биде“, рече Колинс за нејзината работа која ја покрива Белата куќа.