Дипломатијата со Иран може „многу лесно“ да се рестартира ако американскиот претседател Доналд Трамп им наложи на раководството на Израел да ги запре нападите врз Иран, изјави во петокот за Си-Ен-Ен иранскиот претседателски функционер Маџид Фарахани.
„Иран верува во цивилизиран дијалог. Без разлика дали е директно или индиректно, не е важно“, рече Фарахани и додаде дека американскиот претседател „многу лесно може да ја запре војната со еден телефонски повик до Израелците“. Тој, исто така, го повтори ставот на Техеран дека преговорите не се можни додека израелските бомби продолжуваат да паѓаат на иранска територија.
Иран нема да се откаже од збогатувањето на ураниум
Фарахани нагласи дека Иран нема да се согласи на целосно запирање на збогатувањето на ураниум, за кое официјален Техеран сè уште тврди дека се користи исклучиво за мирновременски цели, но отвори врата за одредени отстапки.
Во меѓувреме, европските сили, вклучувајќи ги Франција, Велика Британија и Германија, се придружија на повиците на САД и Израел за целосен прекин на збогатувањето. Францускиот министер за надворешни работи, Кристоф Лемоан, за Си-Ен-Ен изјави дека ставот на Париз е „јасен – нула збогатување“.
Иран, од друга страна, тврди дека му е потребен збогатен ураниум за цивилни цели, иако паралелно произведува и значителни количини материјал близок до степен за оружје.
Трамп остава простор од две недели за преговори
Одлуката на Трамп да отвори двонеделен прозорец за можни преговори пред да донесе конечна одлука за напад врз Иран создава, барем минимално, можност за дипломатски пробив меѓу Техеран и Тел Авив.
Во петокот во Женева се одржаа разговори меѓу министрите за надворешни работи на Иран, Велика Британија, Франција и Германија, заедно со високиот претставник на ЕУ за надворешна политика. Тоа беше првата потврдена средба лице в лице откако ескалираше конфликтот.
По неколку дена остри пораки од Вашингтон, почна да трепери надежта дека воената интервенција сè уште може да се избегне, иако во рамките на тимот на Трамп, се чини, постојат длабоки поделби околу тоа дали да се извршат директни напади врз Иран.
„Доколку Америка се вклучи во војната, ни се достапни многу опции и сите се на маса“, рече Фарахани.
Масовни протести во Техеран: „Смрт за Израел!“
Во петокот, во Техеран се одржаа големи прорежимски протести, а екипата на Си-Ен-Ен извести за толпи кои извикуваа пораки на омраза против Израел и САД на улиците. „Смрт за Израел, смрт за Америка!“ одекнуваше низ улиците на Техеран додека демонстрантите палеа американски и израелски знамиња. Тие носеа знамиња на Иран, Хезболах и Палестина во рацете, додека американското и израелското знаме гореа во знак на протест.
„Трамп, му се закануваш на мојот лидер“, изјави еден демонстрант за Си-Ен-Ен и рече: „Не знае ли дека мојот народ верува дека смртта е послатка од медот?“