Американскиот претседател Доналд Трамп го навлече гневот на светот кога одлучи да воведе царини за остатокот од светот. По неговата наредба на социјалните мрежи започна повикот за бојкот на американските производи, па дури и на самите САД.
Сите негови мерки ги зголемија стравувањата од глобална трговска војна и рецесија. Според Дојче веле, во земји како Германија, анкетите покажуваат дека повеќето граѓани би сакале да ги избегнуваат американските производи ако е можно.
Постојат различни начини на бојкот. Во Шведска, Фејсбук групата „Бојкотирам американски стоки“ собра десетици илјади членови со цел „да ја заштити демократијата и самоопределувањето“. Слични групи се појавуваат во Канада и Франција. Покрај организираното делување преку социјалните мрежи, потрошувачите преземаат и конкретни чекори, поточно активно избегнуваат да купуваат американски производи барајќи алтернативи за нивните брендови, свртувајќи се кон домашни или европски производи.
Покрај тоа, тие ги откажуваат претплатите на услуги како што е Amazon Prime. Се појавија и апликации и веб-страници како „Made O’Meter“, „Buy Beaver“ или „Maple Scan“, кои им помагаат на клиентите да ја идентификуваат земјата на потекло на производот со скенирање на бар-код или фотографирање на пакувањето. Онлајн директориумите како „Buy European Made“ нудат списоци на европски алтернативи.
Има и институционални мерки, како што е данскиот малопродажен синџир кој ги означува европските производи со посебна етикета, додека во канадската провинција Онтарио ги суспендираа нарачките за американски алкохолни пијалоци. Норвешката компанија Haltbakk Bunkers објави дека повеќе нема да доставува гориво за бродовите на американската морнарица.
Според Google, корисниците во Канада, Обединетото Кралство, Франција, Германија, Италија, Швајцарија, Шведска, Данска, Белгија, Индија, Австралија и Нов Зеланд го бараат терминот „Boycott USA“. Луѓето „гуглаат“ термини како „американски производи за бојкот“ и „како да се бојкотираат американските производи“.
Растечкиот бран на бојкоти на американските производи е јасен сигнал за незадоволството на потрошувачите ширум светот. Воден од политички одлуки, трговски тензии и контроверзи во кои се вклучени истакнати деловни луѓе, овој тренд покажува како обичните граѓани ја користат својата економска моќ за да ги изразат своите ставови. Иако целосниот бојкот е често тежок, дури и делумното свртување кон алтернативи може да наштети на угледот и продажбата на американските брендови на глобалниот пазар.
Некои од корисниците на X напишаа дека ги откажале своите патувања во САД.
– Го откажавме планираниот одмор на Флорида што го резервиравме минатиот месец. Решивме да останеме во Канада. Слушнав дека и некои други Канаѓани го направиле истото – напишал канадскиот писател Џефри Лускомб.
Според неодамнешниот извештај на аналитичката компанија Tourism Economics, странските патувања во САД се предвидува да се намалат за 5,5 проценти во 2025 година.
Да потсетиме, планот на Доналд Трамп е да воведе царини, на денот на објавувањето, кој го нарече „Ден на ослободувањето“, воведе универзална тарифа од 10 проценти за целиот увоз од странство, со уште повисоки царини за десетици други земји.
За Македонија се работи за 33 отсто царини.