Американскиот претседател Доналд Трамп денеска му се закани на Иран со бомбардирање и дополнителни царини доколку Техеран не постигне договор со Вашингтон за својата нуклеарна програма.
Трамп изјави дека американските и иранските претставници водат преговори, но не наведе повеќе детали. „Ако не склучат договор, ќе има бомбардирање. Но, ако не постигнат договор, јас исто така ќе им наметнам дополнителни царини, како што направив пред четири години“, рече Трамп за NBC News.
Во текот на неговиот прв мандат (2017-2021), Трамп ги повлече САД од договорот од 2015 година меѓу Иран и светските сили, кој поставуваше строги ограничувања на спорните нуклеарни активности на Техеран во замена за укинување на санкциите.
Трамп, исто така, повторно воведе големи американски санкции, а од тогаш Иран значително ги надмина договорените граници во својата програма за збогатување ураниум.
Техеран досега го отфрли предупредувањето на Трамп за воени последици доколку не постигне договор. Иранскиот претседател Масуд Пезикјан изјави дека Техеран ги отфрла директните разговори со Вашингтон.
Американскиот претседател исто така изјави дека никој нема да биде отпуштен поради неуспеси во националната безбедност, откако новинар по грешка беше додаден во групен разговор на апликацијата „Сигнал“, кој дискутираше за нападите врз Јемен.
Претходно оваа недела, советникот за национална безбедност Мајкл Волц случајно го додаде главниот уредник на Атлантик Џефри Голдберг на групен разговор со високи членови на администрацијата на Трамп, кои разговарале за плановите за напад на Хутите.
Белата куќа се обиде да го минимизира инцидентот, додека Трамп постојано се повикуваше на „лажните вести“ во интервјуто за NBC News.
„Јас не отпуштам луѓе поради лажни вести и измами“, рече Трамп, додавајќи дека сè уште има доверба во Волц и секретарот за одбрана Пит Хегсет.
Трамп остана доследен на своето тврдење дека тоа се лажни вести: „Мислам дека тоа е само измама и лажни вести. Имавме исклучително успешен напад. Погодивме многу силно и смртоносно, но никој не сака да зборува за тоа. Сите сакаат да зборуваат за глупости.“
Трамп повторно најави дека би можел да употреби воена сила за да го преземе Гренланд, автономна територија на Кралството Данска, пишува Политико.
„Ќе го добиеме Гренланд. Да, 100 отсто. Постои голема можност тоа да се направи без воена сила. Не исклучувам ништо“, изјави Трамп за NBC.
Опсесијата на Трамп со овој стратешки остров богат со минерали станала посилна во последниве недели. Тој го постави ова прашање како главен приоритет на националната безбедност, велејќи дека САД мора да ја обезбедат територијата за да ја осигураат својата позиција на Арктикот.
Изјавата на Трамп уследи по еднонеделни дипломатски тензии меѓу САД и Данска, како и посетата на Гренланд на американскиот потпретседател Џеј Ди Венс.