Администрацијата на американскиот претседател Доналд Трамп се закани дека ќе ги поништи патентите на Универзитетот Харвард во вредност од стотици милиони долари, обвинувајќи го универзитетот дека не ги почитува федералните закони за истражувачки грантови.
Во писмото од секретарот за трговија Хауард Лутник до претседателот на Харвард, Алан Гарбер, цитирано од Блумберг, се наведува дека универзитетот не ги исполнува своите обврски кон американските даночни обврзници.
Харвард има рок до 5 септември да покаже усогласеност со прописите, вклучително и обврска да го фаворизира производството во САД, или ризикува да ги изгуби своите патенти. Исто така, владата може да лиценцира патенти на трети страни. Портпаролот на Харвард рече дека мерката е „одмазда“ против универзитетот за одбрана на неговите права и слободи.
Тој истакна дека институцијата е посветена на почитување на законот и дека се стреми јавноста да има корист од иновациите што произлегуваат од федерално финансираните истражувања. Како што пишува Блумберг, ова е прв пат „администрацијата да го користи Министерството за трговија и законот за патенти за да изврши притисок врз Харвард и други престижни образовни институции“.
Американскиот федерален суд моментално го разгледува случајот на Универзитетот Харвард против администрацијата на Трамп во врска со намалувањето на владините средства за 2,6 милијарди долари.