Американскиот претседател Доналд Трамп повторно ја изрази својата контроверзна идеја за Појасот Газа, овој пат на бизнис-тркалезна маса во Катар, каде изјави дека САД би можеле да ја преземат контролата врз областа и да ја претворат во „слободна зона“. Трамп првпат го изнесе овој план уште во февруари, кога рече дека САД би можеле да го обноват Појасот Газа, при што би биле „принудени Палестинците да си заминат“.
Овој предлог наиде на силна меѓународна осуда – од страна на Палестинците, арапските земји и Обединетите нации, кои го оценија како форма на етничко чистење. Говорејќи во Катар, Трамп изјави дека има „неколку идеи за Газа“ кои, според него, можат да донесат добри резултати.
„Претворете го во слободна зона. Вклучете ги САД“, рече Трамп. Тој додаде дека видел воздушни снимки од Газа кои, како што рече, покажуваат дека „речиси ниту една зграда не останала недопрена“. „Не се работи за спасување на нешто – таму нема згради. Луѓето живеат под урнатините, и тоа е неприфатливо“, додаде тој.
Трамп изјави дека би бил „горд ако САД ја преземат Газа и ја претворат во слободна зона“, додавајќи дека тоа би можело да доведе до „некои добри работи“. Тој веќе претходно изјави дека замислува Појасот Газа како „Ривиера на Блискиот Исток“.
Но, Палестинците категорично ги отфрлаат сите планови кои подразбираат присилно иселување. За нив, тоа би било уште една „Накба“ – термин што го користат за катастрофата од 1948 година, кога стотици илјади Палестинци беа протерани од своите домови за време на војната што доведе до создавање на Државата Израел. Многумина од жителите на Газа велат дека, и покрај ужасните услови, претпочитаат да останат на својата земја и да живеат меѓу урнатините, отколку да бидат протерани повторно.