Во жестока расправија со јужноафриканскиот претседател Сирил Рамафоса, одржана во Овалната соба во среда, американскиот претседател Доналд Трамп прикажа фотографии и видеа кои, според него, го докажуваат „геноцидот врз белите земјоделци“ во Јужна Африка. Но, според истрагата на ABC News, снимките што ги користел се погрешно интерпретирани и извадени од контекст.
Едно од видеата што Трамп го прикажал покажува поле со стотици бели крстови. Тој изјавил: „Секое од тие бели нешта што ги гледаш е крст. Има околу илјада од нив. Сите овие се бели земјоделци, членови на нивните семејства… Сите овие луѓе беа убиени“.
Сепак, вистината е поинаква. Снимката е направена на протест одржан на 5 септември 2020 година во близина на Нормандија, Јужна Африка, организиран по убиството на двајца земјоделци – Глен и Вида Раферти. Крстовите биле поставени од волонтери како симболичен споменик, а не како вистински гробови.
Ова го потврди и Јужноафриканскиот институт за расни односи. Портпаролот на Институтот, Херман Преториус, изјави дека „крстовите беа дел од протестната поворка и беа поставени привремено, а подоцна беа отстранети“. Според снимките од Google Street View од мај 2023 година, тие веќе не постојат. Трамп дури прикажал и фотографија од блог која, како што тврдел, е од Јужна Африка – но подоцна било откриено дека е направена во Демократска Република Конго.
На видеото кое Трамп го презентирал се гледа и комунистички политичар како изведува песна против апартхејдот со спорен текст кој повикува на насилство. Рамафоса категорично ги отфрли обвинувањата за „бел геноцид“, велејќи дека тие се лажни и опасни.
„Во нашата земја има криминал. За жал, луѓе се убиваат поради криминални активности, но не се само белци. Повеќето од убиените се црнци“, изјави Рамафоса во Белата куќа. И министерот за земјоделство на Јужна Африка додаде дека повеќето политички партии активно се борат против екстремистички ставови и групи.
Во февруари 2024 година, јужноафрикански суд пресуди дека тврдењата за геноцид врз белите се неосновани, нарекувајќи ги „нереални и измислени“. Иако судот призна дека насилството врз земјоделците е реален проблем, тој истакна дека нема докази дека нападите се расно мотивирани.
Јужна Африка се соочува со сериозна стапка на насилство – според податоците од 2023 година, регистрирани се 45 убиства на 100.000 жители, една од највисоките стапки во светот. Но, експертите велат дека жртвите се од сите раси, а не само белци, како што сугерираат одредени политички кругови.
Овој настан повторно ја отвори дебатата за злоупотреба на информации и манипулации со чувствителни теми како што се криминалот, расата и историјата на апартхејдот во Јужна Африка.