Според последниот извештај од проектот за Мониторинг на убиства на транс луѓе (ТММ – Trans Murder Monitoring), од октомври 2022 до септември 2023 се убиени најмалку 320 трансродови луѓе и луѓе со небинарени родови идентитети, соопштија од ТрансФормА – Иницијатива за правата на трансродовите лица во Северна Македонија, по повод меѓународниот ден на сеќавање на трансродовите и родово различни луѓе чии животи биле одземени поради насилство предизвикано од трансфобија и говор на омраза.
94% од убиените се транс-жени и транс женствени лица, 48% од жртвите чија професија е позната биле сексуални работници/чки, 80% се лица засегнати од расизам, додека 45% од жртвите во Европа чија миграциска историја е позната биле мигранти или бегалци.
Најголем број убиени трансродови и родово различни луѓе се млади на возраст од 19 до 25 години.
-Од 2008 година до денес, според ТММ, насилно се одземени животите на најмалку 4689 трансродови и родово различни луѓе. Според ТММ, оваа бројка не ги вклучива сите убиства на трансродови луѓе во светот, одреден број жртви се непријавени и не документирани.
Сите овие податоци укажуваат на загрижувачки тренд кога станувa збор за интерсекционалноста на мизогинија, расизам, ксенофобија и високиот степен на омраза кон сексуалните работнички, како испреплетени фактори кои ги хранат трансфобијата и анти-транс насилството, укажуваат од Трансформа.
Наведуваат дека во земјава, трансродовите луѓе се соочуваат со насилство предизвикано од говор на омраза, кој во изминатите години е засилен како резултат на анти-транс пропагандата на анти-родовите групи.
-Повикуваме институциите доследно да постапуваат и да го санкционираат говорот на омраза согласност законот. Меѓународниот ден на сеќавање на трансродовите луѓе, прв пат бил одбележан во 1999 година, во спомен на Рита Хестер, но и како револт од понижувачкото известување за нејзиното убиство во медиумите. Денот се одбележува со читање на имињата на убиените за да се одржи споменот на мртвите и се поттикне борба за живите. Ова е причината поради која повикуваме на давање простор и заслување на транс-гласовите, како и посветување на конкретни активности и да ги потенцирате ресурсите и перспективите и да работите за унапредување на транс-правата. Денес, луѓето и организациите ширум светот се мобилизираат за да му се спротивстават на транс-насилството со кое се соочуваме.
Овој ден се сеќаваме на нашата Лора Фер, која го посвети својот живот на борбата за правата и подобрување на животот на транс лицата и сексуалните работници, која храбро се спротиставуваше на дискриминацијата на маргинализираните луѓе.
Лора не е повеќе со нас, но споменот за неа продолжува да живее и инспирира, порачаа од Трансформа.