Грчкиот тенисер Стефанос Циципас, третиот носител на УС Опен, се пласираше во третото коло со победата над Французинот Адријан Манарино со 6-3, 6-4, 6-7 (4), 6-0, но гледачите на стадионот „Артур Еш“ го исвиркаа по долг престој во соблекувалната помеѓу третиот и четвртиот сет.
Гркот се најде под лупа поради долгите отсуства од теренот за време на натпреварите, по натпреварот од првото коло во кој го победи Британецот Енди Мареј во пет сета, откако поранешниот победник на УС Опен поведе со 2-1 во сетови. Мареј по натпреварот рече дека заминувањето на Циципас од теренот и употребата на медицинска помош, за што, според Мареј, немало причина, го исфрлиле од ритамот на натпреварот. Британецот, исто така, изјави дека е психички подготвен за такви потези на Гркот, но дека физички не може да се справи со нив и дека поради тоа Циципас ја загубил почитта.
Гркот потоа беше повикан од некои други тенисери, кои ги свртеа гледачите против него кога направи пауза помеѓу третиот и четвртиот сет од дуелот против Манарино и мина повеќе од седум минути во соблекувалната. Кога се врати на теренот, беше пречекан со свирежи и извици од гледачите, но тоа не го вознемири, бидејќи го остави Французинот без гем во четвртиот сет и со тоа го обезбеди мечот од 3.коло против Карлос Алкараз.
Циципас по натпреварот рече дека целиот бил мокар од пот по третиот сет и дека му е важно да се освежи.
– Не направив ништо лошо, па не разбирам таква реакција. Немам ништо против оние што ме исвиркаа. Ги сакам фановите. Но, некои луѓе не го разбираат тоа. Тие не играат тенис на високо ниво, така што не можат да разберат колку напор е потребен и колку е тешко да го направиме она што го правиме. Понекогаш ни треба кратка пауза за да можеме да го правиме она што го работиме – се оправда Циципас, пренесе Хина.
Манарино призна дека Циципас не направил ништо што правилата не го дозволуваат, но исто така предложил да размислат за нивно менување кога станува збор за подолги заминувања од теренот.
– Правилото не е добро бидејќи не е фер да се прекине така ритамот на натпреварот, но не мислам дека прави нешто погрешно, бидејќи му беше дозволено да го направи тоа – рече Французинот.
И покрај незадоволството на гледачите, Циципас стигна до личен рекорд со 27 аса на овој натпревар, што го подобри неговиот претходен рекорд по број на неодбранливи сервиси на еден натпревар за пет.