Парламентот на Црна Гора во петок, на иницијатива на пет партии предводени од Демократската партија на социјалистите (ДПС) на Мило Ѓукановиќ, ќе се изјасни за предлогот за гласање недоверба на Владата на Дритан Абазовиќ.
Иницијативата беше поднесена од 36 претставници на ДПС, Социјалдемократската партија (СДП), Либералната партија, Социјалдемократите и Демократската унија на Албанците (ДУИ) само неколку часа откако Абазовиќ го потпиша Темелниот договор со Патријархот на Српската православна црква (СПЦ) Порфириј.
За да помине иницијативата во парламентот потребни се 41 глас, што значи дека им недостигаат пет гласа, пренесе Танјуг.
Изминативе денови во подгоричките медиуми се шпекулираше дека разликата во гласовите би можеле да ја надоместат пратениците на Демократска Црна Гора.
Оваа партија има потпишано изјава, по формирањето на парламентарното мнозинство по изборите на крајот на август 2020 година, дека никогаш нема да соработува со ДПС.
Каков ќе биде исходот од седницата, која е закажана за 11:00 часот, тешко е да се предвиди, особено откако шест партии предводени од Демократскиот Фронт (ДФ) поднесоа предлог за гласање недоверба на Владата и импичмент на претседателката на Собранието Данијела. Ѓуровиќ на седницата на 2 септември.
Покрај претставници на ДФ, предлогот го поднесоа и Движењето за промени, Демократите, Демос, Права и Обединета Црна Гора.
Во меѓувреме, Абазовиќ во неколку наврати повтори дека гласањето во парламентот го дочекува „подготвено и опуштено“, и дека нема ништо против повторното составување на парламентарно мнозинство.
Според Уставот на Црна Гора, доколку владата добие доверба, потписниците на предлогот не можат да поднесат нов предлог пред истекот на три месеци.