Менаџерот на Челси, Томас Тухел, ги отфрли прашањата во врска со неговиот судир со тренерот на Тотенхем, Антонио Конте минатата недела и рече дека шегите на социјалните мрежи ги сфатил како нешто нормално. За време на лондонското дерби, двајцата имаа жестока расправија по израмнувањето на Тотенхем на 1-1 и откако мечот заврши 2-2 со голот на Хари Кејн во последната минута.
„Се разбира, сега се смееме. Важно е да можете да се смеете на себе. Се смееме во соблекувалната бидејќи беше на средина на натпреварот. За мене тоа што се случи не беше толку лошо. Тоа беше страст меѓу двајца мажи кои се бореа за својот тим, ништо повеќе. Немам ништо друго освен огромна почит кон него и тоа нема да се промени“, изјави Тухел.
„Ракувањето беше предолго, премногу тешко, признавам, но никој не беше повреден. Тој ми зборуваше на италијански, па не знам што точно рече, но не се навредувавме. Целата работа ќе завршеше многу брзо да немаше 20 луѓе околу нас, што ја направи ситуацијата да изгледа многу полоша отколку што всушност беше. Ако реагираш така, мора да ги прифатиш последиците. Видов некои од шегите на интернет. Сите ме исмејуваат, но тоа е во ред“, додаде тој.
🗣 "Everybody makes fun of me here in the building." 🤣
Thomas Tuchel laughs off the memes about his confrontation with Antonio Conte pic.twitter.com/U4nd3ZBaI4
— Football Daily (@footballdaily) August 19, 2022
Германецот откри дека Н’Голо Канте ќе биде надвор од терените неколку недели. Тој додаде дека Матео Ковачиќ и Армандо Броја ќе го пропуштат гостувањето кај Лидс во недела.
За трансферите, Тухел коментира: „Не сум нервозен по нашите настапи минатата недела. Одигравме одличен натпревар. Работиме на засилувања на тимот, но не е лесно. Трансфер прозорецот е отворен, има можности, но ние сме концентрирани на она што го имаме, а не на она што би можеле да го имаме“.