Пратеничката група на СДСМ и на здружената коалиција смета дека партијата БЕСА треба да има член на Државната изборна комисија (ДИК), но оти притоа треба да се почитуваат законските прописи.
– Ние не отстапуваме од тој став ниту како партија, ниту како пратеничка група, меѓутоа нормално почитувајќи ги и другите законски одредби затоа што матичната комисија во Собранието треба да одлучи каде е проблемот во ова прашање односно помеѓу кои закони постои колизија во нивното спроведување и даде автентично толкување во барањето на БЕСА, изјави денеска координаторот на пратеничката група на СДСМ Томислав Тунтев.
Партијата БЕСА смета дека треба да има член во ДИК имајќи го предвид резултатот постигнат на последните предвремени парламентарни избори во декември.
Претседателот на ДИК Александар Чичаковски, пак, вели дека единствен надлежен за тоа прашање е Собранието на Република Македонија. Во интервју за МИА тој потенцира дека членовите на ДИК се избрани од Собранието на Република Македонија во процедура и со мандат утврден согласно Изборниот законик .- Оттаму единствен надлежен орган за одговор на ова прашање е Собранието на Република Македонија, изјави Чичаковски./а1Он