Турција изврши воздушни напади во северен Ирак и уништи 20 цели на забранетата Курдистанска работничка партија (ПКК), соопшти во неделата вечерта турското министерство за одбрана.
Турски авиони ги гаѓаа базите на ПКК во Гара, Хакурк, Метина и Кандила, се наведува во соопштението, пренесува „Ксинхуа“.
Воената интервенција уследи по бомбашкиот напад пред турското министерство за внатрешни работи во Анкара во неделата наутро, во кој беа ранети двајца полицајци. Во експлозијата загина еден напаѓач, додека друг бил убиен од полицијата.
Министерството за внатрешни работи соопшти дека еден од напаѓачите е идентификуван како член на ПКК, додека идентитетот на другиот се утврдува.
Турските сили често спроведуваат копнени операции, воздушни напади и артилериски бомбардирања во северен Ирак против ПКК, особено во планините Кандил, главната база на групата.