Комисијата за надворешни работи на турскиот парламент ќе расправа за ратификацијата на членството на Шведска во НАТО алијансата кога тоа ќе дојде на ред по вообичаениот тек, изјави денеска претседателот на Комитетот, додавајќи дека прашањето не е толку итно за Анкара како што е за некои други земји.
Предлог-законот Шведска-НАТО „ќе се дискутира кога ќе дојде време во согласност со агендата на Комитетот за надворешни работи“.
„Сè што е итно за другите земји не е нужно итно за нас“, рече Фуат Октај пред пратениците на состанокот во парламентот.
Турскиот претседател Реџеп Тајип Ердоган пред десет дена официјално го проследи барањето за прием на Шведска во НАТО до турскиот парламент, по 17 месеци блокада, соопштија од неговиот кабинет.
Ердоган го отстрани ветото уште во јули
Во јули, Ердоган го укина ветото за прием на Шведска во НАТО, додавајќи дека ратификацијата ќе зависи од турскиот парламент, кој продолжи со работа по летната пауза на први октомври. Од летото, Ердоган продолжи да врши притисок врз Шведска да преземе мерки против „навреда на Куранот“.
Анкара ги обвинува шведските власти дека се премногу меки кон курдските милитанти кои живеат на нејзина територија и бара екстрадиција на десетици од нив. Анкара го одобри влезот на Финска во НАТО на 30 март.