Турција жестоко реагираше на веста дека УЕФА отвори истрага за дефанзивецот Мерих Демирал, кој ги постигна двата гола во емотивната победа од 2-1 над Австрија на ЕП 2024, со која Турците се пласираа во четвртфиналето на турнирот.
По натпреварот, УЕФА најави дека може да го казнат Демирал за начинот на кој ја изразил радоста – мавтајќи со знакот на националистичката турска организација „Сиви волци“. Министерството за надворешни работи на Турција брзо реагираше и го повика германскиот амбасадор во земјава Јирген Шулц. Министерството соопшти дека истрагата против Демирал е неприфатлива, бидејќи „Сивите волци“ не биле забранета организација во Германија.
„Понатаму, германската Федерална канцеларија за заштита на уставот објави извештај во септември 2023 година во кој се нагласува дека знакот „сив волк“ не мора нужно да се поврзе со десничарскиот екстремизам“, се вели во ставот на министерството, за кое се додава дека истрагата против Демирал е ксенофобична и политички мотивирана.
Скандалот дојде откако германската министерка за внатрешни работи, Ненси Фајзер, побара од УЕФА да го казни Демирал за неговите постапки, велејќи дека знаците на екстремно десничарскиот турски екстремизам немаат место на германските стадиони и дека Европското првенство не е платформа за такви дела. Позицијата на Турција е исто така доста остра и зборовите на Фајзер ги нарекува „фашистички“.
Ова е уште еден сличен инцидент на Евро 2024, откако Албанецот Мирлинд Даку отслужи суспензија од два натпревари, откако го постави тонот за навредливо скандирање насочено кон Србите и Македонците по ремито со Хрватска во групната фаза.