Полскиот премиер Доналд Туск изјави дека „јасно е дека се намалува секоја надеж што Украина ја има за цврсти безбедносни гаранции со физичко присуство на Соединетите држави“. Тој смета дека Полска треба да продолжи да бара најдобри можни односи со САД, но рече дека тие мора да имаат подготвен одговор на „длабока корекција на американските приоритети“.
– Да не се преправаме дека сме задоволни со тоа. Нашата безбедност е директно поврзана не само со линијата на фронтот во Украина, туку и со идниот статус на таа земја, вели премиерот.
Туск откри и дека ќе поддржи повлекување на Полска од Конвенцијата за касетна муниција, откако Литванија одлучи да го стори тоа поради руската закана. Полјаците сакаат да ја напуштат и Конвенцијата за противпешадиски мини во Отава.
Полскиот премиер го нападна и унгарскиот премиер Виктор Орбан, кој вчера одби да ги потпише заклучоците на Европскиот совет за Украина, индиректно прогласувајќи го за „корисен идиот“.
– Русија на Путин сака да ги искористи предавниците на европските интереси или корисни идиоти. Не би сакале да бидете во кожата на Орбан вчера. Швеѓаните, Данците, Французите, дури и Словаците кои молчеа (Роберт Фицо, н.з.), сите се согласија со заклучоците и размислуваа за иднината на Украина, остро одговори тој.
Туск, кој е историчар по професија, на крајот направи паралела со грчкиот отпадник Ефиалт, кој, според легендата, ги водел Персијците зад грбот на грчката војска во клисурата Термопили, каде што загинале спартанскиот крал Леонидас и 300 Спартанци. Поради ова, тој стана синоним за предавник.
– На крајот беше презиран и од оние што го ангажираа и од оние што ги предаде – нималку дипломатски истакна полскиот премиер.