Во Шпанија продолжуваат да се појавуваат детали за уапсениот и потоа ослободен играч на Севиља, Кике Салас, кој е осомничен дека намерно добивал жолти картони на крајот од минатата сезона поради обложување.
Според извештаите, целта била да се искористат двајца пријатели на 22-годишниот фудбалер од неговиот роден град Морон де ла Фронтера, кои се обложувале. Се споменува дека освоиле сума од најмалку 9-10.000 евра. Пријавата пред еден месец ја поднеле обложувалници кои откриле невообичаено движење на пари.
Телефонот на Салас бил запленет и сите информации од него ги пренела полицијата. „Марка“ го цитира „Ел Конфиденцијал“, потсетувајќи и дека играчот зема плата од околу 360.000 евра годишно и има договор со клубот до 2029 година.
Беа истражени вкупно околу 30 облози, вклучувајќи пет од натпреварите на крајот од сезоната 2023/2024 година во кои младиот дефанзивец на Севиља доби официјално предупредување. Статистиката покажува дека Салас добил вкупно 10 жолти картони минатата сезона во Примера, при што тие станале особено зачестени кон крајот на сезоната. Постојано добивал жолт картон на последните 4 натпревари од минатата сезона – со Виљареал, Кадиз, Атлетик Билбао и Барселона, сите загубени од Андалузијците.
Во меѓувреме, неговиот клуб Севиља излезе со официјално соопштение за ова прашање. Андалузијците во оваа фаза не најавуваат дека ќе го казнат својот играч.
„Клубот ја покажува својата целосна почит кон правните постапки и принципот на презумпција на невиност. Севиља, по настаните што се случија овој вторник во врска со нашиот играч Кике Салас, сака да покаже целосна почит кон правната постапка. Исто така сака да го истакне своето почитување на принципот на презумпција на невиност на нашиот фудбалер. Секако, Севиља ги осудува сите измамнички дела во светот на спортот, а особено оние кои можат да влијаат на правичноста на натпреварувањето“, напиша клубот.
На Салас му се заканува затворска казна од шест месеци до три години за измама, како и забрана за играње фудбал од две до пет години.