По наредба на Вишото јавно обвинителство во Србија, уапсен е контроверзниот српски политичар Срѓан Ного поради упатување смртни закани кон претседателот на Србија, Александар Вучиќ и поттикнување насилство, објавија српските медиуми. Ного е познат за македонската јавност откако на неговите канали на социјалните мрежи објавуваше снимки, како и детали за случајот со двојното убиство на Вања Ѓорчевска и Панче Жежовски.
На политичарот му е одредена мерка притвор до 48 часа и во тој рок ќе биде спроведен на распит.
Како што е објавено, Ного е уапсен поради постоење основи на сомнение дека сторил кривично дело „Повикување на присилна промена на уставниот поредок“ од член 309 од Кривичниот законик на Србија. Од претходно се водеше дека е во бегство.
Во јануари 2024 година, Ного објавуваше исечоци од снимки и наметна нови дилеми во јавноста поврзани со убиството на 14-годишната Вања и 74-годишниот Панче. Тој тврдеше дека токму таткото на Вања, а не полицијата ги открил, поврзал и решил случајот со исчезнувањето на Панче и неговата ќерка. Потоа следеше реакција од Основното јавно обвинителство – Скопје кои информираа дека сите потребни докази за утврдување на траекторијата на движењето на осомничените се обезбедени и не постои никаква опасност за компромитација на истрагата за убиствата со објава на снимки од видеонадзор на објекти.
Ного, како што пишува во биографијата објавена на неговата веб-страница, е еден од основачите и водачите, прво на движењето, а потоа и на партијата Двери во Србија. За пратеник во српскиот парламент е избран на изборите во 2016 година и таму останува до 2020 година. Во 2019 година бил исклучен од партијата, а до крајот на мандатот дејствувал како независен пратеник. Важи за промотор на теории на заговор и експонент на руските интереси во регионот.